شادی

کوردشۆپ- سەنتەری بەرهەمهێنانی ئۆتۆمبێلی ئەمریکیی "ئالەف" ڕایگەیاند، مۆڵەتی ئۆتۆمبێلێکی مۆدێل A کە هەم لەسەر وشکانی دەڕوات و هەم دەتوانێت لە ئاسماندا بفڕێت، لەلایەن ئیدارەی فڕۆکەوانیی فیدراڵی ویلایەتە یەکگرتووەکانی ئەمریکاوە پەسەند کراوە.

سەنتەری بەرهەمهێنانی ئۆتۆمبێلی ئەمریکیی "ئالەف" ڕایگەیاند، مۆڵەتیان لە ئیدارەی فڕۆکەوانیی فیدراڵی ئەمریکا بۆ ئۆتۆمبێلی مۆدێلی A وەرگرتووە و ئەو ئۆتۆمبێلە دەتوانێت هەم لەسەر وشکانی بڕوات و هەم بە ئاسماندا بفڕێت.

کۆمپانیای ئالەف ئایرۆنۆتیکس کە بارەگا سەرەکییەکەی لە کالیفۆڕنیایە، ڕایگەیاندووە کە ئۆتۆمبێلی مۆدێلی A بە تەواوی کارەباییە و ٢ کورسیی هەیە و دەتوانێت ڕێگری لە ڕووداوی هاتوچۆ بکات.

بەپێی هەواڵی "ئێن تی‌ڤی"، کۆمپانیاکە ڕایگەیاندووە کە بۆ وەرگرتنی مۆڵەتی ئاسمانیی تایبەتی سنووردارکراوی FAA، تاقیکردنەوەی مۆدێلی A بە سەرکەوتوویی تەواو بووە.

وێڕای ئەمانە، "ئالەف" لە ساڵی ٢٠١٩ەوە هەموو مۆدێلە سەرەکییەکانی مۆدێلی Aی تاقی کردووەتەوە و ئەم هەواڵە هەنگاوێکی گەورەیە لەم بوارەدا.

Dukhovny، بەڕێوەبەری جێبەجێکاری کۆمپانیای "ئالەف" ڕایگەیاند کە مۆدێلی A بە تەواوی کارەباییە و دەتوانێت لەسەر ڕێگا گشتییەکان هاتوچۆ بکات، هەروەها ڕایگەیاند کە ئۆتۆمبێلەکە بە توانای بەرزبوونەوە و نیشتنەوەی ڕاستەوخۆ، دیزاین کراوە.

بەڵام Dukhovny ئاماژەی بەوەش کرد کە ئەو مۆڵەتە تایبەتەی پێیان دراوە هێشتا سنووردارە و باسی لەوەش کرد کە ئەو شوێنانەی بۆیان دیاری کراون کە ئەم ئۆتۆمبێلە دەتوانێت بفڕێت، سنووردارە.

"ئالەف" ڕایگەیاندووە کە مۆدێلی A بە نرخی ٢٩٨ هەزار و ٥٢٠ دۆلار بۆ فرۆشتن پێشکەش دەکرێت و فرۆشتنی لە ساڵی ٢٠٢٥ەوە دەست پێ دەکات.