- KURDŞOP
Roja Sêşemî 23ê Çileya 2024an, hevdem digel 25emîn salvegera koça dawî ya hunermendê navdarê Kurd ê bajarê Mehabadê yê Rojhilatê Kurdistanê, “Mihemed Mamilê”, di rêûresmeke mezin de li bajarê Hewlêrê yê paytexta Herêma Kurdistanê, bi amadebûna hunerdost û komek kesayetiyên hunerî, wêjeyî û siyasî û hwd, xelata salane ya “Mamilê” pêşkêşê hunermendê navdar ê Kurd û xelkê Bakurê Kurdistanê “Şivan Perwer” hate kirin.
Ev rêûresme ji aliyê Birêveberiya Giştî ya Rewşenbîrî û Hunerî ya Hewlêrê, Navenda Hunerî ya Mamilê û Saziya Pêşxistina Karê Ragihandinê ve û bi beşdariya malbata Mamilê li salona rewşenbîrî ya Hewlêrê hate lidarxistin.
Ew rêûresme wek hêmayeke rêzlênanê ji hunermendên naskirî yên Kurd, heyama 15 salan e ji aliyê Navenda Hunerî ya “Mamilê” ve pêşkêşê wan hunermendê têkoşer tê kirin ku ji bo xizmetkirina hunera resen a Kurdî têkoşîn kirine û îsal jî ev xelate pêşkêşê mamoste “Şivan Perwer” hate kirin û ji ber direngketina geşta balafira ku biryar bû Şivan Perwer ji Almaniyayê ve pê bê Hewlêrê, navbirî nekarî xwe bigihîne rêûresmê û bi destê xwe xelatê werbigire. Lê xelat bi nûneratiya wî bi mamoste “Ezîz Şarox” yê hunermendê naskirî yê xelkê Mehabadê re hate dan.
Di heyama 15 salên derbasbûyî de li çar parçeyên Kurdistanê, ev mamoste, hunermend û aliyên jêrîn xelata Mamilê wergirtine: “Qela Mere, Endêriyas Îsraîl Xemo (Bakurî), Ebas Kemendî, Ezîz Şarox, Nasir Rezazî, Zozan, Girûpa Muzîzê ya Silêmaniyê, Mezher Xaliqî, Xelîl Xemgîn, Husên. Sefameniş, Mihemedriza Darabî, Dilşad Seîd û Kawa Feqîzade.”
Hêjayî gotinê ye ku sala borî (2023) û hevdem digel şoreşa Jînayê li Îran û Rojhilatê Kurdistanê, rêûresma bîranîna Mihemed Mamilê li Hewlêrê hate lidarxistin, lê ji ber rewşa Rojhilatê Kurdistanê û Îranê, xelata Mamilê bi ti hunermendekî re nehate danê.
Kurteyek li ser Mihemed Mamilê:
Mihemed Mamilê navê wî yê tevaw “Mihemed Seîd Elî” ye, di sala 1925an de li bajarê Mehabadê yê Rojhilatê Kurdistanê ji dayik bûye û wî zêdetir ji 700 stran gotiye. Wî bi piranî helbestên helbestvanên Kurd ên mezin ên wek “Wefayî, Marif Axayî, Goran, Hejar Mukriyanî û Hêmin Mukriyanî” kiryie bi stran û gelek caran jî bi xwe jî helbest nivîsiye. Di sala 1999an de li temenê 74 saliyê jiyana xwe ji dest daye, lê heta niha jî hunera wî bi zîndî di nav xelkê de maye.
Kurteyek li ser mamoste Şivan Perwer:
Mamoste “Şivan Perwer”, hunermendê navdar û damezrînerê saziyeke bi heman navê, di sala 1955an de li gundê Sûrî yê ser bi parêzgeha Rihayê ya Bakurê Kurdistanê ji dayik bûye. Ew wek hunermendekî xwedî helwest ji aliyê Kurdên cîhanê ve tê naskirin. Girîngiya berhemên Şivan ew e ku li çar aliyên Kurdistanê belav bûne û li cîhanê bêhtir wek “balyozê çandî yê Kurdistana kevin û nû” tê naskirin. Ew ji rêya Saziya Rewşenbîrî ya Navnetewiya “Şivan Perwer” ve dixwaze bibe pirek ji bo nasandin, gekeşepêdan û parvekirina çand û muzîka Kurdî li seranserê cîhanê.
